மோடி நடவடிக்கையால் நமக்கு என்ன நடக்கும்...!

மோடி நடவடிக்கையால் நமக்கு என்ன நடக்கும்

இரு வாரங்களுக்குமுன், இரண்டு நிகழ்வுகள் இந்தியாவை புரட்டிப் போட்டன. அமெரிக்க அதிபர் தேர்தல் முடிவை, உலகமே ஆர்வமுடன் எதிர்பார்த்துக் கொண்டிருந்தவேளையில், அதையே மறக்கடிக்கும் விதமாக, அதிரடியாக ஒரு வித்தையை அரங்கேற்றிக் காட்டினார் மோடி.நாட்டில் புழக்கத்தில் இருந்த 500, 1000 ரூபாய் நோட்டுகளை, 8ம் தேதி இரவு, 12 மணிக்கு மேல் செல்லாது என்று அவர் அறிவித்தார்.

கைமேல் என்ன பலன்?

         இந்தியாவில் புழக்கத்தில் உள்ள நோட்டுகளில், 86 சதவீதம் 500, ஆயிரம் ரூபாய் நோட்டுகள் தான். இவை அதிக அளவு புழக்கத்தில் வருவதில்லை. காரணம், பதுக்கப்படுகிறது, மேலும், பாகிஸ்தானில் இருந்து, இதே மதிப்பிற்கு கள்ள நோட்டுகள் அச்சிடப்பட்டு இந்தியாவிற்குள் கடத்தி வரப்படுகிறது.
இது, அதிகரித்துக்கொண்டே இருந்ததால், 500, 1000 ரூபாய் நோட்டுக்களை தடை செய்வதை தவிர அரசுக்கு வேறு வழியில்லை. மேலும், தீவிரவாதிகள் ஆயுதங்கள் வாங்க, 500 மற்றும் ஆயிரம் ரூபாய் நோட்டுகளையே பயன்படுத்தி வந்தனர். இது, தற்போது முற்றிலும் தடுக்கப்படும். 

விளைவு என்ன?

     மோடியின் அதிரடியால், உடனடியாக என்ன பலன் என்று பார்த்தால், டிச., 30க்குள் மக்கள் தங்களிடம் உள்ள பணத்தை வங்கியில் டிபாசிட் செய்ய கெடு வழங்கப்பட்டிருக்கிறது.இரண்டு லட்சத்து 50 ஆயிரத்துக்கு மேல் வங்கியில் டிபாசிட் செய்வோரிடம், வருமானவரித் துறை கேள்விகள் எழுப்பும். கறுப்புப் பணத்தை டிபாசிட் செய்வோருக்கு, 90 சதவீதம் வரை வரி விதிக்கப்படலாம் என கூறப்படுகிறது. ஒருவரிடம், 500 கோடி கறுப்பு பணம் இருப்பதாக வைத்துக் கொள்வோம். கொண்டு போய் வங்கியில் கட்டினால் அவர் அந்த பணத்துக்கு, 450 கோடி ரூபாய் வருமான வரி செலுத்த வேண்டியிருக்கும்; மீதமிருக்கும் 50 கோடி மட்டுமே அவருக்கு கிடைக்கும். 

அரசுக்கு வருவாய்

மேற்கண்ட கணக்கீட்டின்படி அந்த நபர், அந்த பணத்தை செலுத்தாமல் விட்டுவிட்டால் என்ன ஆகும்? ரிசர்வ் வங்கிக்கு அது, லாபம் தரும். அதாவது, ரிசர்வ் வங்கியின் 'பேலன்ஸ் ஷீட்'டில் அவர்கள் அச்சடித்து வெளியிட்டுள்ள பணம் அனைத்தும் அவர்களுடைய பொறுப்பு அல்லது கடன் என்று எடுத்துக் கொள்ள வேண்டும். அதாவது, ரிசர்வ் வங்கியின் 'லயபிலிட்டி'. அந்த பணம் வங்கிக்கு டிசம்பர் 30ம் தேதிக்குள் வராமல் போனால், அதன்பிறகு செல்லாது. அதனால் அவர்களுக்கு அந்த பணத்தின் மீது பொறுப்பு அல்லது கடன் இல்லை. அதாவது 'லயபிலிட்டி' இல்லை. இப்படி சுமார், மூன்று லட்சம் கோடிகள் வங்கிகளுக்கு வராமல் போகலாம் என்று எதிர்பார்க்கப்படுகிறது. இது அப்படியே ரிசர்வ் வங்கிக்கு லாபம் அல்லது அரசுக்கு லாபம். இதுதவிர நாட்டில் உள்ள, 500, ஆயிரம் ரூபாய் கள்ள நோட்டுகள் ஒழிக்கப்பட்டுவிடும். இது இரண்டும் மிகப்பெரிய லாபம் என்று எடுத்துக் கொள்ளலாம். 

டிபாசிட் அதிகரிக்கும், வட்டி குறையும்:

இனி, வங்கிகளில் சேமிப்பு கணக்கு, நடப்பு கணக்கு போன்றவைகளில் அதிக பணம், அதாவது டிபாசிட் வர ஆரம்பிக்கும். அது வங்கிகள் குறைந்த வட்டியில் கடன்களை கொடுக்க ஏதுவாகும். வங்கி கடன் வட்டி வீதங்கள் குறையும். அது குறுகிய காலத்தில் பல நடைமுறை சிக்கல்களை உண்டாக்கினாலும் நீண்டகால அடிப்படையில் நாட்டுக்கு நன்மை பயக்கும். கிரெடிட் கார்டு, டெபிட் கார்டு, வாலட், இன்டர்நெட் பாங்கிங் உபயோகங்கள் அதிகரிக்கும். 

          கணக்கில் காட்டாத பணம் வைத்திருப்பவர்கள், எப்படி கணக்கு காட்டுவது என்பதை தெரிந்து கொள்ள ஆடிட்டர்களை நோக்கி ஓடிக்கொண்டு இருப்பார்கள்.  அதே சமயம் வங்கிகளின் டிபாசிட் வட்டி விகிதங்களும் குறையும். டிபாசிட் வட்டியையே நம்பி இருப்பவர்கள், எந்த வங்கியில் தற்போது அதிக வட்டி கிடைக்கிறதோ அங்கு தற்போதே போட்டு விடுவது நல்லது.

நடைமுறை சிக்கல்கள்

எந்தவொரு பெரிய திட்டத்தையும் அமல்படுத்தும்போதும், நடைமுறை சிக்கல்கள் இல்லாமல் இருக்காது. இப்போது நாட்டில் புழக்கத்தில் உள்ள மொத்த பணத்தின் மதிப்பு, 13.6 லட்சம் கோடி ரூபாய். இதில் சுமார், 86 சதவீதம், 500, ஆயிரம் ரூபாய் நோட்டுகள். இவற்றை மாற்றி, 100, 500, 2000 என்று வங்கிகளுக்கு ரிசர்வ் வங்கி கொடுக்க வேண்டும். அவை பொது மக்களுக்கு கொடுக்கப்பட வேண்டும். ஒரே சமயத்தில் நாடு முழுவதும் இவ்வளவு பணத்தை ஒரு இடத்தில் இருந்து இன்னொரு இடத்திற்கு கொண்டு செல்ல பாதுகாப்பான வசதிகள் ஏற்படுத்தப்பட வேண்டும். இது ஒரு பெரிய சவாலான முயற்சி. 

நம்ம பணத்தை அரசு எடுத்துக்குமா?

                        பழைய நோட்டு கொடுத்து புதிய நோட்டு, 4 ஆயிரம் ரூபாய், பின்னர் 4500, பின்னர், 2000 ரூபாய் வரை மாற்றிக் கொள்ளலாம் என்பது மிகவும் சிறிய தொகை. ஆதலால், 10 ஆயிரம் ரூபாய் வரை ஒருமுறை மாற்றலாம் என்று அறிவித்திருந்திருந்தால் அது நிச்சயம் டென்ஷனை குறைத்திருக்கும்.ஆனால், அரசு இதை செய்யாத காரணம், 2,000 மற்றும், 500 புதிய நோட்டுகள் அச்சடிக்கப்பட்டு தயாராகவில்லை. முன்னேற்பாடு செய்யாமல் தடாலடியாக அதை அறிவித்தது அரசுக்கு ஒரு பெரிய பின்னடைவுதான். பழைய நோட்டுக்குப் பதில் மக்களுக்கு, 2,000 ரூபாயாக மக்களுக்கு கொடுத்ததும் கொந்தளிப்பை ஏற்படுத்தியது. அந்த நோட்டை கொடுத்தால் அன்றாட செலவுகளுக்கு, சில்லரையின்றி என்ன செய்வார்கள்?வங்கிகள் பக்கமே போகாதவர்கள், இந்தியாவில் பல கோடி மக்கள் இருக்கிறார்கள். தங்கள்
வருமானத்தை வீட்டிலேயே ரொக்கமாக அவர்கள் சேர்த்து வைத்திருப்பார்கள். அப்படி, 2 லட்சத்து 50 ஆயிரம் ரூபாய்க்குமேல் சேர்த்து வைத்திருக்கும் மக்களுக்கு இருக்கும் அச்சம், தாங்கள் பாடுபட்டு சேமித்த பணத்தை அரசு எடுத்துக் கொண்டு விடுமோ என்பதுதான். அதை எப்படி அரசு சரி செய்யப் போகிறது என்ற எதிர்பார்ப்புதான் எல்லா பக்கமும்.

மறுபடியும் முதலில் இருந்து

நரேந்திர மோடி, பிரதமராகி இரண்டரை வருடங்களாகிறது. இதில் எடுக்கப்பட்ட முடிவுகளில் மிகப்பெரியது, முக்கியமானது இதுவாகத்தான் இருக்கும். சாமானிய மக்களிடையே முதலில் ஒரு கொந்தளிப்பு இருந்தாலும், நம்மிடம்தான் அவ்வளவு பணம் இல்லையே, பணத்தை பதுக்கி வைத்திருப்பவர்கள்தானே கவலைப்படவேண்டும் என்ற எண்ணமும் மக்களிடையே இருக்கிறது. கணக்கில் காட்டாமல், பணத்தை பெருமளவில் பதுக்கி வைத்திருப்பவர்கள்தான், என்ன
செய்வது என்று தெரியாமல் முழித்துக் கொண்டிருக்கிறார்கள். அவர்கள் தங்கள் ஆட்டத்தை மறுபடி முதலில் இருந்து தொடங்க வேண்டும். தொலை நோக்கில் பார்த்தால், இது நல்ல திட்டம்தான். கணக்கில் வராமல் பணத்தை இரண்டு கைகளாலும் வாங்கிய கல்வி நிறுவனங்கள், அரசியல்வாதிகள், அரசு ஊழியர்கள் அதிகம் பாதிக்கப்படுவார்கள். ஆனால், ஒழுங்காக வரி செலுத்தும் சாதாரண மக்களுக்கு, இப்போது நிச்சயமாக பெரிய பாதிப்புகள் இருந்தாலும், வீடு விலை குறையும், தங்கம் விலை குறையும், வங்கி கடன் வட்டி வீதங்கள் குறையும், தீவிரவாதம் குறையும், நாடு சுபிட்சமாகும் என்பவை நல்ல செய்தி தானே? ஆனால், அதை செயல்படுத்திய விதத்தில் குளறுபடிகள் இல்லாமல் இருந்திருந்தால் நிச்சயம் இன்னும் நற்பலன் தந்திருக்கும்.

தங்கம் விலை இனி என்ன ஆகும்?

          நமது நாட்டில், தங்க மார்க்கெட் பெருமளவு ரொக்க பணத்தில் (கேஷ்) இயங்குகிறது. தங்களிடம் உள்ள கறுப்பு பணத்தைக் கொண்டு தங்கம் வாங்குபவர்கள்தான் அதிகம். அது, இனி குறையும். எனவே, தங்கம் விலை குறையும். அதேசமயம், எந்த ஒரு நிலையற்ற காலங்களிலும் மக்கள் விழுந்தடித்துக் கொண்டு தங்கம் வாங்குதற்கு ஓடுவார்கள். ஒலிம்பிக்கில்கூட அப்படி ஓடியிருக்கமாட்டார்கள். இனி, அப்படி ஓட்டங்கள் இருக்காது. தேவைக்கு தான் தங்கம் வாங்கப்படும். ஆதலால், தங்கம் விலை குறைவதற்கான வாய்ப்புகள் அதிகம் உள்ளன. 

விலைவாசி குறையுமா?

             இப்போது இருக்கும் சூழ்நிலையில் மக்களிடம் வாங்கும் சக்தி இருந்தாலும், வாங்குவதை தள்ளிப் போடும் எண்ணம்தான் இருக்கிறது. அதாவது, ஒரு வாஷிங் மெஷின் வாங்க நினைத்தால்கூட இப்போது இருக்கும் பழைய மிஷினை வைத்து மேனேஜ் செய்து கொள்ளலாம். நிலைமை சரியானதும் வாங்கிக் கொள்ளலாம் என்ற எண்ணம் பலரிடமும் பிரதிபலிக்கும். மேலும், ஒரு ஓட்டலுக்கு சாப்பிட செல்வதற்கும், விடுமுறையில் வெளியூர் செல்வதற்கும் கூட யோசித்து, யோசித்து செய்யும் நிலைக்கு தள்ளப்பட்டுள்ளதால், பொருட்களுக்கு தேவை குறையும். தேவை குறையும்போதும், உற்பத்தி அதிகமாக இருக்கும்போதும், உற்பத்தியாளர்கள் விற்க வேண்டும் என்ற நிலைக்கு தள்ளப்படும் போதும் பொருளின் விலையை குறைக்க முற்படுவார்கள். லாபத்தை குறைத்து விற்க நினைப்பார்கள். இதனால் பொருட்களின் விலை குறையும் வாய்ப்புகள் அதிகம். 

யாருக்கு சாதகம்?யாருக்கு பாதகம்?

ரியாலிட்டி துறை: 
           இது மிகவும் பாதிக்கப்படலாம். இந்த துறையில் வொயிட் அண்டு ப்ளாக் (60:40) என்பது சாதாரணமானது. இதனால் அந்த துறை மிகவும் வளர்ச்சி அடைந்து வந்தது. இப்போது 'பிளாக்' காணாமல் போய்விட்டதால் வீடுகள் விற்பதில், இடங்கள் விற்பதில் தேக்கம் ஏற்படும். இதனால் வீடு, இடங்கள் விலை குறையும். சாதாரண மக்களுக்கு இது ஒரு நல்ல செய்திதான். 
வங்கிகள்: 
            டெபாசிட் வட்டி வீதங்கள் குறையலாம், கடன்களுக்கான வட்டி வீதங்களும் குறையலாம். வங்கிகளுக்கு மூலதனம் அரசு மூலமாக கிடைக்கலாம், வங்கிகளின் வராக் கடன்கள் அதிகரிக்கலாம். பைனான்ஸ் கம்பெனிகள்: 
வராக் கடன்கள் அதிகரிக்கலாம். 
பார்மா கம்பெனிகள்: 
      டாலருக்கு எதிராக ரூபாய் வலுவிழக்கிறது. அமெரிக்காவில் ட்ரம்ப் அதிபர் ஆனதால்
இந்திய பார்மா கம்பெனிகளுக்கு எதிர்ப்பு இருக்காது. 

எல்லாம் செய்து விட்டு சத்தமில்லாமல் நாட்டில் எதுவுமே நடக்காதது போல மோடி ஜப்பான் சென்று வந்து விட்டார். மோடி “சுவாச் பாரத்” என்றார்..... அப்போது பலருக்கு அர்த்தம் புரியவில்லை. எப்படி இந்தியா போன்ற நாடு சுத்தமாகும் என்று ஏளனமாகப் பார்த்து கொண்டிருந்தார்கள். ஆனால், இப்போது தான் அதன் அர்த்தம் புரிகிறது!

சிறு வணிகர்களுக்கு என்ன பாதிப்பு?

        இந்தியாவில், 10 கோடிக்கும் அதிகமாக சிறு வணிகர்கள் இருக்கிறார்கள். இவர்களின் தினசரி விற்பனையெல்லாம் ரொக்கம்தான், இவர்களில் 2 அல்லது 3 சதவீதம்தான் டெபிட் கார்டுஅல்லது கிரெடிட் கார்டு வாயிலாக வணிகம் நடத்துகிறார்கள்.இதுதவிர, லாரி, சரக்கு ஆட்டோ, மினி வேன் வைத்திருப்பவர்கள், சிறு வணிகம் செய்பவர்கள் மிகவும் பாதிக்கப்பட்டுள்ளனர். இவர்கள் இதுவரையில் கேஷ் டீலிங்தான் செய்து வந்தார்கள். உடனடியாக இன்டர்நெட் வணிகத்துக்கோ, கார்டுகள் பயன்படுத்தவோ தெரியாது, மாறுவதும் கடினம். இது சிறு வணிகர்கள் உட்பட பல தரப்பினரையும் பாதிக்கும்.
இதனால் அவர்கள் வாங்கிய கடன்கள் கட்டப்படாமல் தள்ளிப் போகலாம். பல வாராக்கடன்கள் ஆகலாம். இப்படி வாராக் கடன்கள் இன்னும் அதிகமானால், பைனான்ஸ் கம்பெனிகள், வங்கி கள், மைக்ரோ பைனான்ஸ் கம்பெனிகளுக்கு சுமை அதிகரிக்கும். ரிசர்வ் வங்கியும், மத்திய அரசும் இவற்றை கவனத்தில் கொண்டு சிறு வணிகர்கள் உட்பட ரொக்க வணிகத்தில் இருப்பவர்களின் பிரச்னையை தீர்க்க வழி கண்டறிய வேண்டும்.மேலும் பல்வேறு தொழில்கள் இயங்குவதற்கு தேவையான பணத்தை வங்கிகளில் எடுக்க முடியாத சூழ்நிலை இருப்பதால் எல்லா துறைகளும் பெரிதாக இயங்க முடியாத நிலை. ஜுவல்லரி கம்பெனிகள்:பாதிப்பு
வீட்டுக்கடன் கம்பெனிகள்:பாதிப்பு
ரியல் எஸ்டேட்: பாதிப்பு சிமெண்ட் கம்பெனிகள்:பாதிப்பு
ஐ.டி. கம்பெனிகள்: சாதகம், பாதகம் இரண்டும்.ஆடம்பர பொருட்கள்:பாதிப்பு